網紅的藏寶箱《對唔住與X你老母》
星期六下午，我係商場等外賣之際，突然聽到有人咆哮出一句X你老母，望過去，一個五十左右既阿叔係度同一個未到三十既男人對峙，阿叔話男人撞到佢，男人就話無，然後阿叔唔肯比佢走，男人同行三個人人多勢眾，亦唔怕阿叔，見識到咩叫最初口角，繼而動武。
男人一手推開阿叔，阿叔大叫有人打人，圍觀有一個男人食花生食得好高興大叫，打佢老母啦！阿叔即時拎電話出黎影，商場職員亦出黎了解發生咩事，然後阿叔講完一輪話要報警，男人話睇閉路電視囉，阿叔就死都話佢有撞到自己。
最後警察到場，分開兩批人，而我既外賣都到，所以就無再睇落去。
講真，我無睇到事發經過，男人有冇撞到阿叔我唔知，但男人推阿叔我就親眼睇到，咁客觀講，唔係好大力，真係推開佢唔比阿叔跟住自己既力度，但呢一堆，阿叔就話佢打佢。
我一邊行一邊諗，其實真係好小事，撞到人，無論有心定無心，無論係佢撞你定你撞佢都好，一句唔好意思，一句對唔住，大事化小，其實件事就會完；可惜，大家選擇屌老母，將小事化大，最後我睇到都成二十分鐘，未知最後要搞幾耐，會唔會玩到上警署之類。
記得好多年前，我同朋友行街都發生過相同既事，唔小心碰撞，然後口角，最後大家都有同行朋友，拉走左就算，比人撞既朋友佢一路行一路鬧，自己無錯，點解要就佢，大不了咪報警。
我同佢講，呢個世界唔係事事都要講對錯，有一種人，佢地錯得好清晰，但佢地唔會同你講道理，只會同你玩泥漿摔角，將你個程度拉低到同佢一樣，再用經驗去擊倒你；你啱，我知你知天知地知，咁唔需要同一個明顯係無可救藥既人糾纏，有咁多時間心力去為一個陌生人，一個之後唔會再見既人，一個唔知會做咩既人去講對錯，真係值得咩？最後你得到既對錯，早已心知，更何況，講完一輪都未必會令對方知錯。
一句對唔住，可以令自己繼續自己既生活，將時間花係更值得既事上。
對錯？其實公道自在人心，自己知咪得囉。
你會諗，咁咪便宜左佢？
我引述一個虛構故事，有個小朋友拜年將親戚屋企畫得滿牆顏料，佢媽媽話小朋友唔好同佢計較，事主無責備小朋友，仲送左一套新顏料比佢，然後佢有次終於係商場畫牆然後要賠高昂清潔費。
錯既，無事係好彩，出事，係應該。
對於好人講對唔住，會令人改善；對惡人講對唔住，殺傷力可能比X你老母更強。
一句對唔住，唔係放過人，而係放過自己
Search